ڕێکخراوی ئاشتی و ئازادی ڕاهێنانی دوو ڕۆژەی لە پارێزگای هەولێر لە ڕێکەوتی ۱۹-۲۰ی تمووزی ٢٠٢٦ ڕێکخست، بە بەشداریی ۲۰ نوێنەر لە وەزارەتی کار و کاروباری کۆمەڵایەتی لە هەولێر، ژووری بازرگانی و پیشەسازیی هەولێر، بەڕێوەبەرایەتی و ئۆفیسەکانی کار و دەستەبەری کۆمەڵایەتی لە ناوچە و پارێزگا جیاوازەکان، لەگەڵ نوێنەرانی بەشەکانی دەستەبەری کۆمەڵایەتی و تەندروستی و سەلامەتیی پیشەیی لە کەرکووک، و بەڕێوەبەرایەتیی کار و کاروباری کۆمەڵایەتی لە نەینەوا بە بەشە جیاوازەکانییەوە، لەوانەش تۆڕی پاراستنی کۆمەڵایەتی، دەستەبەری کۆمەڵایەتی، پشکنینی کار، و کرێکارانی بیانی.
ئامانجی راهێنانەکە بەهێزکردنی زانیاری و توانای بەشداربووان بوو لە بواری پشکنینی کار، دەستەبەری کۆمەڵایەتی، و تەندروستی و سەلامەتیی پیشەیی، لە ڕێگەی دابینکردنی زانیاری و ئامرازی پێویست بۆ پێشخستنی ئەدای کارکردنیان بەپێی یاسا نیشتمانییەکان و پێوەرە نێودەوڵەتییەکانی کار. لە ڕۆژی یەکەمدا، گفتوگۆکان تیشکیان خستە سەر چوارچێوەی یاسایی بۆ پشکنینی کار، بەرپرسیارێتی و دەسەڵاتەکانی پشکنەرانی کار، ڕێکارەکانی پشکنین و ئامادەکردنی ڕاپۆرت، جگە لە ناساندنی بڕگە و ڕێنماییەکانی دەستەبەری کۆمەڵایەتی و میکانیزمەکانی جێبەجێکردنی.
لە ڕۆژی دووەمدا، گفتوگۆکان سەرنجیان خستە سەر تەندروستی و سەلامەتیی پیشەیی، هەڵسەنگاندن و بەڕێوەبردنی مەترسییەکان، شیکردنەوەی داتاکانی پشکنین و سوودوەرگرتن لێیان بۆ دیاریکردنی کارە لەپێشینەکان، لەگەڵ تاوتوێکردنی ئەو بەربەستانەی ڕووبەڕووی کاری پشکنین دەبنەوە، و پێشکەشکردنی توێژینەوەی حاڵەت و ڕاهێنانی پراکتیکی و چالاکیی کاریگەر کە یارمەتیدەر بوون لە بەهێزکردنی فێربوون و ئاڵوگۆڕی ئەزموون لە نێوان بەشداربوواندا.
ڕاهێنانەکە دەرفەتێک بوو بۆ پێشخستنی زانیاری و بەهرەکانی بەشداربووان، و بەهێزکردنی تواناکانیان بۆ جێبەجێکردنی پرۆسەکانی پشکنینی کار، جێبەجێکردنی بڕگەکانی دەستەبەری کۆمەڵایەتی، و بەدواداچوون بۆ پێداویستییەکانی تەندروستی و سەلامەتیی پیشەیی، بە جۆرێک کە پاراستنی مافی کرێکاران بەهێزتر دەکات، ئاستی کوالێتیی ژینگەی کار بەرز دەکاتەوە، و پشتگیری لە پابەندبوون بە یاسا نیشتمانییەکان و پێوەرە نێودەوڵەتییەکانی کار دەکات.
ئەم چالاکییە بەشێکە لە پڕۆژەی "کاریگەریی ڕێکخراوەکانی کۆمەڵگەی مەدەنی لەسەر کەمکردنەوەی نایەکسانی لە عێراق"، کە لەلایەن ڕێکخراوی ئاشتی و ئازادی و بە هاوبەشی لەگەڵ ڕێکخراوی فریاگوزاری میللەتی نەرویجی جێبەجێ دەکرێت.
